Croeso i’r Gronfa Ceisio am Swydd Etholiadol ar gyfer Pobl Anabl

Mae’r gronfa Ceisio am Swydd Etholiadol ar gyfer Pobl Anabl yn cynnig grantiau unigol o rhwng £250 a £40,000 i bobl anabl sy’n bwriadu sefyll etholiad.

Mae’r grantiau yn helpu diwallu’r anghenion cefnogol ychwanegol gan unigolyn anabl sy’n gysylltiedig ag anabledd. Heb y gefnogaeth hon, gallai unigolyn anabl wynebu rhwystr ychwanegol yn y prosesau dewis ac ymgyrchu o gymharu ag unigolyn heb anabledd.

Gwybodaeth Hawdd ei Darllen (pdf)

Ydw i’n gymwys?

Gallwch wneud cais am arian o’r gronfa os byddwch yn:

gallu cadarnhau eich bod yn gymwys i sefyll yn unol â gofynion y gyfraith etholiadol, a nodir yng nghanllawiau’r Comisiwn Etholiadol
gallu darparu tystiolaeth mewn perthynas â’ch anabledd, ac
yn gallu rhoi tystiolaeth eich bod wedi bod yn gysylltiedig â neu â diddordeb mewn gweithgareddau dinesig, cymunedol neu berthnasol eraill.

Mae’r gronfa ar gyfer costau ychwanegol cysylltiedig ag anabledd y mae’n rhaid i chi eu talu fel rhan o’r broses o sefyll etholiad. Ni ellir ei defnyddio ar gyfer talu costau cyffredinol y mae unrhyw ymgeisydd etholiad yn eu hwynebu e.e. costau ymgyrchu (fel taflenni). Nid yw ychwaith ar gyfer costau byw cyffredinol. Nodwch fod y gronfa yn gyfyngedig, a dim ond mewn eithriadau y caiff grantiau mwy o faint (er enghraifft, £40,000) eu rhoi, lle bydd yr ymgeiswyr yn wynebu costau ychwanegol sylweddol sy’n gysylltiedig ag anabledd ac yn gallu profi hynny.